Wawili wafa mvua Morogoro

Watu wawili wanaume wamefariki dunia kwa nyakati tofauti kutokana na athari za maji yaliyotokana na mvua zinazoendelea kunyesha maeneo mbalimbali ndani ya Mkoa wa Morogoro.

Kamanda wa Polisi wa mkoa huo, Alex Mkama amethibitisha Janauri 30, 2025 kutokea kwa vifo hivyo ambapo tukio moja lilitokea usiku wa kuamkia Janauri 30, mwaka huu Mtaa wa Majengo Mapya, Kata ya Lukobe, Manispaa ya Morogoro.

Amemtaja mtu huyo aliyefariki dunia alifahamika kwa jina la Hashim Khasimu Juma (43) mkulina na mkazi wa Kihonda B , katika Manispaa hiyo.

Mkama amesema kuwa Hashim alikufa maji alipokuwa anajaribu kuvuka mto ambao ulikuwa umejaa maji kutokana na mvua zinazoendelea kunyesha mkoani Morogoro.

Kamanda wa Polisi wa mkoa huyo ametaja tukio lingine la kifo cha mtu kufa maji lilitokea Januari 29, mwaka huu majira ya mchana katika mtaa wa Mafisa Kkata ya Mafisa ,Manispaa ya Morogoro .

Mkama amesema siku hiyo ulipatikana mwili wa mtu mmoja mwanaume anayekadiliwa kuwa na umri wa miaka 35-40 ukiwa ndani ya maji yaliyotuama mithiri ya dimbwi akiwa tayari amefariki.

Amesema mtu huyo hajaweza kufahamika na inadhaniwa kuwa alishindwa kujiokoa baada ya kutumbukia ndani ya shimo hilo kutokana na mvua zinazoendelea kunyesha kwa kiasi kikubwa.

“ Mwili huo umehifadhiwa katika chumba cha kuhifadhi maiti ili kutoa nafasi kwa ndugu kuutambua” amesema Mkama.

Mkama ametoa wito kwa wananchi kuchukua tahadhari kubwa wakati huu wa mvua zinazoendelea kunyesha na kushauriwa kuacha kujaribu kina cha maji kwa hisia au kwa miguu badala yake wapite kwenye maeneo au vivuko vyenye usalama.