Raila Odinga alikuwa zaidi ya kiongozi wa chama cha ODM. Kwa wanasiasa waliotembea naye kwa miaka mingi, alikuwa mshauri, rafiki, mzalendo na mwavuli uliowapa nafasi watu wenye misimamo tofauti kufanya kazi pamoja.
Mwaka mmoja baada ya kifo chake, viongozi waliokuwa karibu naye wanakumbuka ujasiri wake, uwezo wake wa kujenga miungano na alivyoshawishi mijadala ya kisiasa na kuathiri mwelekeo wa serikali.
Waziri wa Kawi Opiyo Wandayi anasema kifo cha Raila kilikuwa pigo kubwa kwake, kwani alipoteza mtu aliyekuwa amesafiri naye kwa miaka mingi kisiasa.
Wandayi alipokea habari za kifo cha Raila asubuhi ya Oktoba 15, 2025, akiwa ndani ya ndege kuelekea Kitui kuungana na Rais William Ruto katika ziara ya maendeleo.
Alipigiwa simu na mtu aliyewafahamu wote wawili, kisha akapigiwa na Seneta Oburu Oginga, aliyethibitisha habari hizo za kusikitisha.
Wandayi anasema Raila hakuwa tu kiongozi wa chama, bali pia rafiki, mshauri na dira yake ya kisiasa. Anakumbuka kuwa alipoamua kujiunga na Baraza la Mawaziri la Rais Ruto Agosti 2024, alifanya hivyo akiwa na imani kuwa Raila alikuwa amemuunga mkono.
Uamuzi huo ulimfanya aachane na wadhifa wa Kiongozi wa Wachache katika Bunge la Kitaifa, ambao ulimpa nafasi muhimu ya kuongoza upinzani bungeni.
Kwa Wandayi, hatua hiyo ilikuwa ishara ya imani ambayo Raila alikuwa nayo kwake.
Anasema kifo cha Raila kilifichua changamoto ya urithi wa kisiasa ndani ya ODM, huku viongozi wakishindania nafasi ya kuongoza chama.
“Raila hakuwa mwanasiasa wa kawaida. Alikuwa na uwezo wa kusoma mikondo ya kisiasa, kuweka ajenda ya taifa na, muhimu zaidi, kujenga miungano,” anasema Wandayi.
Kwa upande wake, Waziri wa Fedha Kitaifa John Mbadi anakumbuka mazungumzo yake ya mwisho na Raila katika Nairobi Club, siku chache kabla ya kiongozi huyo kusafiri kwenda India kwa matibabu.
Mazungumzo hayo yalihudhuriwa pia na Kiongozi wa Wachache katika Bunge la Kitaifa Junet Mohamed na aliyekuwa kamishna wa Tume Huru ya Uchaguzi na Mipaka (IEBC).
Mbadi alikuwa amewasilisha hali ya uchumi katika mkutano wa mwisho wa wabunge uliohudhuriwa na Raila. Walikutana tena kujadili uchumi na fedha za kaunti, huku Raila akimtaka Mbadi kushauriana na Profesa Hiroyuki Hino kuhusu madeni ya nchi.
“Hakikisha Ruto anafanikiwa, nasi tutakusaidia,” Mbadi anakumbuka Raila akimwambia.
Mbadi anasema Raila alitaka Rais Ruto afanikiwe katika mipango yake, ikiwemo Mamlaka ya Afya ya Jamii (SHA) na mradi wa nyumba za gharama nafuu.
Anamtaja Raila kama mzalendo aliyekuwa tayari kuweka kando azma yake binafsi kwa maslahi ya nchi. Pia alikosoa serikali ikikosea na kuisifu ikifanya jambo linalofaa.
Hata hivyo, viongozi hao wanakiri kuwa ODM inakabiliwa na changamoto ya kudumisha umoja bila kiongozi huyo. Mbadi anataka viongozi washauriane zaidi na kuhakikisha chaguzi za mchujo zinafanyika kwa uwazi.
Wandayi anasema chama kinapaswa kuimarisha taasisi zake, kuheshimu maoni tofauti na kuzuia azma za kibinafsi kusigeuka kikwazo cha maendeleo.
Kwao, urithi wa Raila hauishii katika ODM. Maisha yake yalihusishwa na mapambano ya demokrasia ya vyama vingi, mageuzi ya Katiba, ugatuzi na uhuru wa kisiasa.
Ingawa hayupo tena, Wandayi anasema kizazi cha sasa kitahukumiwa kwa namna kitakavyotumia nafasi ya kisiasa aliyoisaidia kuunda.
Mbadi na Wandayi wasimulia wanavyomkosa Raila Odinga
This story was originally published by Taifa Leo.
Read the full story at Taifa LeoRelated stories
NewsIcoT yatakiwa kuongeza wataalamu ujenzi
MOROGORO: Serikali imesema itaendelea kuiimarisha Taasisi ya Teknolojia ya Ujenzi (ICoT), ili kutayarisha wataalamu wengi wenye ujuzi na umahiri watakaoweza kujiajiri na kuajirika kikamilifu katika utekelezaji wa miradi mbalimbali ya maendeleo nchini. Katibu Mkuu wa Wizara ya Ujenzi Balozi, Aisha Amour amesema hatua hiyo inalenga kuongeza upatikanaji wa mafundi sanifu na wataalamu wa kada mbalimbali…
NewsKampuni za Amerika zashinda zabuni kuchimba madini Kwale
MUUNGANO wa kampuni nne za Amerika umeshinda zabuni ya kuendeleza uchimbaji na uchakataji wa madini-adimu na niobium katika eneo la Mrima Hill, Kaunti ya Kwale, ambayo thamani yake inakadiriwa kuzidi Sh6 trilioni. Waziri wa Madini Hassan Joho alitangaza Frontier Minerals Consortium kuwa mshindi wa zabuni hiyo ya matrilioni ya fedha baada ya mchakato wa tathmini na ukaguzi wa ununuzi kukamilika. Ushindi huo unaipa Amerika nafasi muhimu katika sekta ya madini ya kimkakati nchini Kenya, huku ikiendelea kushindana na China kudhibiti upatikanaji na uchakataji wa madini hayo duniani. Kampuni zinazounda muungano wa ushirika huo ni Frontier Minerals LLC, Bunker Hill Mining Corp, ReElement Technologies na American Resources Corporation. Kila kampuni ina utaalamu wake katika uchimbaji, upatikanaji wa madini adimu, uchakataji na usafishaji wa madini muhimu kwa viwanda vya kisasa. Madini ya niobium katika Mrima Hill hutumika katika utengenezaji wa vifaa vya anga, huku madini-adimu yakihitajika katika magari ya umeme, vifaa vya kielektroniki, mitambo ya upepo, silaha za kisasa na teknolojia ya Akili-Unde. Kampuni ya ReElement Technologies tayari imevutia uwekezaji wa serikali ya Amerika wa Dola milioni 25 (takriban Sh3.2 bilioni) uliotangazwa mnamo Julai 2026 kusaidia uwekaji wa vifaa katika kiwanda chake cha kusafisha madini adimu katika jimbo la Indiana, Amerika. Uwekezaji huo ni sehemu ya juhudi za Amerika kupunguza kutegemea China, ambayo inaongoza duniani katika uchakataji wa madini hayo. Kampuni saba ziliorodheshwa kushindania mradi huo mnamo Julai, zikiwemo kampuni mbili za China, miungano miwili ya kampuni kutoka Amerika, muungano wa Australia na ubia wa Kenya na Uingereza. Kampuni za China baadaye zilijiondoa. Joho alisema kushinda zabuni hakumaanishi kampuni hiyo inaweza kuanza uchimbaji mara moja. Inapaswa kwanza kupata leseni zinazohitajika, kutekeleza masharti ya kisheria na kushirikisha jamii ya eneo hilo. Serikali pia imesisitiza kuwa madini hayo hayapaswi kuuzwa yakiwa ghafi, bali yaongezwe thamani nchini kupitia viwanda vya uchakataji. Muungano huo umesema utajenga uwezo wa kuchakata madini nchini, hatua inayoweza kuunda nafasi za ajira na kuongeza mapato. Kwa Kenya, mradi huo unatoa fursa ya kupanua uchumi ambao kwa muda mrefu umetegemea kilimo na utalii. Mapato ya sekta ya madini yalipungua kutoka Sh35 bilioni mwaka 2022 hadi Sh20.3 bilioni mwaka jana, hasa kutokana na kufungwa kwa migodi ya madini ya titanium katika Kaunti ya Kwale. Hata hivyo, mafanikio ya mradi wa Mrima Hill yatategemea uwekezaji, masharti ya leseni na namna jamii zitakavyoshirikishwa na kunufaika.
News2027: ACF warns of emerging political violence, urges restraint
…Forum urges Tinubu, governors to ensure fairness to opposition By Ibrahim Hassan-Wuyo The Arewa Consultative Forum (ACF) has raised concerns over emerging signs of political violence ahead of the 2027 general elections, urging political leaders, security agencies and Nigerians to embrace restraint and protect democratic values. The forum warned that provocative demonstrations, stone-throwing, abusive chants […]
NewsUtatu haki jinai watakiwa kuimarisha ushirikiano
ARUSHA: Mwanasheria Mkuu wa Serikali, Hamza Johari, ameitaka Taasisi ya Kuzuia na Kupambana na Rushwa (TAKUKURU), Ofisi ya Taifa ya Mashtaka (DPP) na Jeshi la Polisi, kwa kushirikiana na taasisi nyingine za haki jinai, kutekeleza majukumu yao kwa uadilifu, uaminifu na uzalendo ili kujenga imani ya wananchi kwa Serikali. Johari amesema hayo leo jijini Arusha…