MIILI ya vijana wawili kati ya watatu walioripotiwa kutoweka baharini eneo la Shella, Kaunti ya Lamu, ilipatikana Jumatatu ikielea karibu na ufuo huo huo wa Shella.
Akithibitisha taarifa hizo, Meneja wa Kituo cha Kukabiliana na Majanga ya Dharura Lamu (EOC), Iftakhar Majid, alisema miili hiyo ilipatikana kufuatia operesheni inayoendelea ya kuwasaka waliotoweka wakati wakiogelea baharini ufuoni Shella mnamo Jumapili jioni.
Bw Majid alisema kwa sasa operesheni bado inaendelea ili kuusaka mwili wa tatu. Vijana hao walikuwa miongoni mwa kundi la wana-rika 30 waliokuwa wamezuru Lamu kutoka eneo la Hongwe, tarafa ya Mpeketoni kwa shughuli za kikanisa.
Baada ya kukamilisha shughuli zao za kanisa mapema Jumapili, waliandamana hadi ufuo wa Shella ili kujivinjari kwa kuogelea. Hali ilibadilika ghafla pale watatu waliokuwa miongoni mwa makumi ya walioogelea waliposhindwa nguvu, hivyo kutoweka baharini.
“EOC ilipokea simu kutoka kwa msamaria mwema aliyetufahamisha kilichokuwa kikiendelea Shella. Ilikuwa majira ya saa 12 unusu hivi jioni ya Jumapili. Tulifika eneo husika na kuanzisha msako mara moja lakini tulikatiza operesheni katikati baada ya giza kusheheni kwani usiku ulikuwa umewadia,” akasema Bw Majid.
Operesheni ya kusaka miili ya watatu hao hata hivyo ilirejelewa Jumatatu asubuhi, hivyo kupelekea kuopolewa kwa miwili ambayo ni ya mwanaume na mwanamke.
Operesheni inaendelezwa na maafisa wa kituo cha EOC Lamu kwa ushirikiano na Kenya Coast Guard Service (KCGS), Shirika la Msalaba Mwekundu nchini na wapiga mbizi wa kujitolea.
“Kwa sasa operesheni bado inaendelea kuusaka mwili wa tatu na wa mwisho. Ningeshauri watalii, wageni na wenyeji kuwa makini wanapoogelea kwenye fuo zetu. Baadhi ya fukwe, ikiwemo Shella, ni hatari kwa usalama wao kwani zimesheheni vidimbwi vya kina kirefu,” akasema Bw Majid.
Pia aliwataka wavuvi na mabaharia wengine kuwa makini na kutii maonyo ya kila mara yanayotolewa na ofisi yake na ile ya Idara ya Hali ya hewa kuhusiana na hali ilivyo baharini.
Si mara ya kwanza watu kufa maji wakati wakiogelea kwenye ufukwe wa Shella, Lamu.
Julai 2018, mwanafunzi wa Taasisi ya Mafunzo na Kiufundi (TVET) ya Lamu, Juma Mohamed, alikufa maji wakati akiogelea Shella.
Novemba 2018, kijana wa miaka 25 kwa jina Joseph Kitsao, pia alikufa maji akiogelea kwenye ufukwe wa Shella.
Wenzake wawili waliokolewa na wapiga mbizi wa kujitolea waliokuwa karibu wakati wa tukio.
Mbali na Shella, sehemu zingine zinazotambuliwa kuwa hatari kwa kuogelea na hata kuvuka ukisafiri kwenye Bahari Hindi, Kaunti ya Lamu ni vivuko vya Mkanda, Manda Bruno, Mlango wa Kipungani, vyote vikipatikana Lamu Magharibi.
Vingine ni Mlango wa Tanu huko Mkokoni, Mlango wa Ali upatikanao Kiwayu na Mlango wa Bomani ulioko Kiunga, vyote vikiwa Lamu Mashariki.
Miili ya vijana wawili waliokufa maji ufukweni Shella, waopolewa

This story was originally published by Taifa Leo.
Read the full story at Taifa LeoRelated stories
TravelMiss World Kufungua Milango ya Utalii
ZANZIBAR imeendelea kujitokeza kama moja ya vivutio muhimu vya utalii nchini, safari hii ikipokea ugeni wa Miss World 2026, Joheirry Molla aliyewasili visiwani humo Novemba 19, 2026, akiwa ameambatana na warembo kutoka mabara sita.
TravelAskari Tanapa, TFS mbaroni mauaji ya wabeba mkaa
KAGERA; Jeshi la Polisi Mkoa wa Kagera linawashikilia askari 13, wakiwemo wa wanyamapori wa Mamlaka ya Hifadhi za Taifa (TANAPA), askari wa Wakala wa Huduma za Misitu Tanzania (TFS) na askari mgambo, kwa tuhuma za mauaji ya watu wanne yaliyotokea Kijiji cha Kanyamika, Kata ya Karambi, Tarafa ya Kimwani, Wilaya ya Muleba mkoani Kagera. Taarifa…
TravelNgorongoro scoops continental gong
ACCRA: THE Ngorongoro Conservation Area Authority (NCAA) has won the Excellence in Sustainable Tourism and Conservation Management Award at the Africa Business Forum & Awards 2026. The award recognises Ngorongoro’s contribution to biodiversity conservation, sustainable tourism development and the protection of its outstanding natural and cultural heritage. The awards ceremony was held in Accra, Ghana,…
TravelDk Kijaji: Mashindano makubwa gofu Afrika kufanyika Serengeti
MARA; Waziri wa Maliasili na Utalii, Dk Ashatu Kijaji, amesema Uwanja wa Gofu wa Hifadhi ya Taifa ya Serengeti utawezesha Tanzania kuwa mwenyeji wa mashindano makubwa ya gofu ya Afrika na kimataifa, hatua inayotarajiwa kuongeza idadi ya watalii, mapato na kuitangaza nchi kupitia utalii wa michezo. Akizungumza leo Oktoba 18, 2026, wakati wa uzinduzi wa…