KAGERA: Miradi sita yenye thamani ya zaidi ya Sh bilioni 4.8 imepitiwa na Mbio za Mwenge wa Uhuru mwaka 2026 katika Halmashauri ya Wilaya ya Bukoba mkoani Kagera, ikiwa na lengo la kuboresha huduma za kijamii na kuongeza fursa za kiuchumi kwa wananchi.
Miradi hiyo imejikita katika sekta za elimu, afya, maji, viwanda, utawala bora na uwezeshaji wananchi kiuchumi.
Akizungumza wakati wa ziara hiyo, Kiongozi wa Mbio za Mwenge wa Uhuru mwaka 2026, Wazo Mwang’onda, amepongeza uongozi wa Halmashauri ya Wilaya ya Bukoba kwa usimamizi madhubuti wa fedha za Serikali na utekelezaji wa miradi inayokidhi viwango.
Mwang’onda amesema hatua hiyo ni ishara ya uwajibikaji na imekuwa na mchango mkubwa katika kuimarisha huduma zinazotolewa kwa wananchi.
Amesema Serikali imekusudia kuboresha maisha ya Watanzania kwa kuwekeza katika miundombinu ya huduma za kijamii pamoja na miradi inayowawezesha wananchi kiuchumi.
Aidha, amesema watendaji wa Halmashauri ya Wilaya ya Bukoba wameonesha moyo wa kizalendo kupitia usimamizi mzuri wa fedha na miradi, jambo linalosaidia kuhakikisha rasilimali za umma zinatumika kwa manufaa yaliyokusudiwa.
Miongoni mwa miradi iliyotembelewa na Mwenge wa Uhuru ni ujenzi wa Zahanati ya Kijiji cha Katangalala, Mradi wa Maji Bumai, ujenzi wa Ofisi ya Kata ya Karabagaine na Kiwanda cha Kuchakata Parachichi.
Miradi mingine ni pamoja na mradi wa vijana wa ufugaji wa samaki kwa kutumia vizimba pamoja na ujenzi wa vyumba vya madarasa kwa ajili ya kuboresha mazingira ya kujifunzia na kufundishia.
Viongozi wamewataka wananchi kuendelea kushirikiana na Serikali katika kulinda na kutunza miundombinu inayojengwa ili iweze kutoa huduma kwa muda mrefu.
Wananchi pia wamehimizwa kutumia fursa zinazotokana na miradi ya kiuchumi, hususan katika sekta za kilimo, ufugaji wa samaki na uchakataji wa mazao, kwa lengo la kujikwamua kiuchumi.
Mwenge wa Uhuru umemaliza mbio zake katika Wilaya ya Bukoba na sasa unaendelea na mbio zake katika Wilaya ya Missenyi mkoani Kagera, ukiwa na ujumbe wa kuhamasisha uwajibikaji, matumizi sahihi ya rasilimali za umma, mshikamano na utekelezaji wa miradi yenye tija kwa wananchi.




